ਮੋਗਾ, 20 ਜੁਲਾਈ (ਜਸ਼ਨ): ਕੱਲ ਮੋਗਾ ਤੋਂ ਧਰਮਕੋਟ ਰੋਡ ’ਤੇ ਵਾਪਰੇ ਸੜਕ ਹਾਦਸੇ ਵਿਚ ਸਰਕਾਰੀ ਪ੍ਰਾਇਮਰੀ ਸਕੂਲ ਕੋਟਈਸੇ ਖਾਂ ਵਿਖੇ ਤੈਨਾਤ ਮਹਿਲਾ ਅਧਿਆਪਕ ਦੀ ਮੌਤ ਹੋ ਗਈ ਜਦਕਿ ਉਸ ਦੀ ਸਾਥੀ ਅਧਿਆਪਕਾ ਗੰਭੀਰ ਰੂਪ ਵਿਚ ਜ਼ਖਮੀ ਹੋ ਗਈ। ਮਿ੍ਰਤਕ ਅਧਿਆਪਕਾ ਦੀ ਪਹਿਚਾਣ ਜਸਪ੍ਰੀਤ ਕੌਰ ਵਜੋਂ ਹੋਈ ਹੈ । ਮਿ੍ਰਤਕਾ ਜਸਪ੍ਰੀਤ ਕੌਰ ਕੋਟਕਪੂਰਾ ਦੀ ਰਹਿਣ ਵਾਲੀ ਸੀ ਅਤੇ ਉਸ ਨੂੰ ਧਰਮਕੋਟ ਬਲਾਕ ਅਧੀਨ ਪੈਂਦੇ ਪ੍ਰਾਇਮਰੀ ਸਕੂਲ ਦਾ ਸਟੇਸ਼ਨ ਦਿੱਤਾ ਗਿਆ ਸੀ। ਘਟਨਾ ਉਸ ਸਮੇਂ ਵਾਪਰੀ ਜਦੋਂ ਉਹ ਛੁੱਟੀ ਸਮੇਂ ਤੋਂ ਬਾਅਦ ਆਪਣੇ ਸਕੂਲ ਦੇ ਇੰਚਾਰਜ ਅਧਿਆਪਕਾ ਦਰਸ਼ਨਪਾਲ ਕੌਰ ਨਾਲ ਮੋਗਾ ਵੱਲ ਨੂੰ ਆ ਰਹੀ ਸੀ , ਜਦੋਂ ਜਸਪ੍ਰੀਤ ਕੌਰ ਨੇ ਆਪਣੇ ਦੋਪਹੀਆ ਵਾਹਨ ਨੂੰ ਸੜਕ ’ਤੇ ਚੜ੍ਹਾਇਆ ਤਾਂ ਪਿੱਛੋਂ ਆ ਰਹੀ ਕਾਰ ਨੇ ਉਹਨਾਂ ਨੂੰ ਟੱਕਰ ਮਾਰ ਦਿੱਤੀ, ਜਿਸ ਉਪਰੰਤ ਦੋਵੇਂ ਅਧਿਆਪਕਾਂ ਵਾਹਨ ਤੋਂ ਡਿੱਗ ਪਈਆਂ । ਇਸ ਹਾਦਸੇ ਵਿਚ ਜਸਪ੍ਰੀਤ ਕੌਰ ਦੀ ਮੌਕੇ ’ਤੇ ਮੌਤ ਹੋ ਗਈ ਜਦਕਿ ਦਰਸ਼ਨਪਾਲ ਕੌਰ ਮੋਗਾ ਦੇ ਸਿਵਲ ਹਸਪਤਾਲ ਵਿਚ ਜ਼ੇਰੇ ਇਲਾਜ ਹੈ। ਸਿੱਖਿਆ ਵਿਭਾਗ ਦੇ ਅਧਿਕਾਰੀਆਂ ਨੇ ਦੱਸਿਆ ਕਿ ਕੁਝ ਦਿਨ ਪਹਿਲਾਂ ਪੰਜਾਬ ਸਰਕਾਰ ਨੇ 6635 ਈ ਈ ਟੀ ਅਧਿਆਪਕਾਂ ਦੀ ਨਿਯੁਕਤੀ ਕੀਤੀ ਸੀ ਜਿਸ ਤਹਿਤ ਹੀ ਕੋਟਕਪੂਰਾ ਦੀ ਰਹਿਣਵਾਲੀ ਜਸਪ੍ਰੀਤ ਕੌਰ ਨੂੰ ਇਹ ਨੌਕਰੀ ਮਿਲੀ ਸੀ ।