ਗੁਰਦਾਸਪੁਰ,28 ਮਾਰਚ  (ਜਸ਼ਨ) :ਜਿਲ਼ਾ- ਗੁਰਦਾਸਪੁਰ ‘ਚ ਤੈਨਾਤ ਮੈਡੀਕਲ ਅਫਸਰ (ਹੋਮਿਓਪੈਥੀ) ਡਾ. ਇਦੰਰਜੀਤ ਰਾਣਾ (9478207800) ਦਾ ਆਖਣਾ ਹੈ ਕਿ ਸਿਵੀਅਰ ਅਕਯੂਟ ਰੈਸਪਿਰੇਟਰੀ ਸਿੰਡ੍ਰੋਮ ਸ਼੍ਰੇਣੀ ਦੇ ਵਾਇਰਸ ਤੋਂ ਫੈਲਣ ਵਾਲਾ ਇਹ ਇੰਕ ਅਜਿਹਾ ਸੰਕ੍ਰਮਕ ਰੋਗ ਹੈ ਜਿਸਨੇ ਕਿ ਵਿਸ਼ਵ ਦੇ ਲੱਗਭੱਗ 199 ਦੇਸ਼ਾਂ ਨੂੰ ਅਪਣੀ ਚਪੇਟ ਵਿੱਚ ਲੈ ਕੇ ਘਾਤਕ ਮਹਾਮਾਰੀ ਦਾ ਰੂਪ ਲੈ ਲਿਆ ਹੈ। ਇਹ ਰੋਗ ਸੰਕ੍ਰਮਣ ਪ੍ਰਭਾਵਿਤ ਵਿਅਕਤੀ ਦੀ ਖਾਂਸੀ ਜਾਂ ਛਿੱਕਣ ਤੋਂ ਨਿਕਲਣ ਵਾਲੇ ਪਾਣੀ ਦੇ ਛਿੱਟਿਆਂ ਦੇ ਸੰਪਰਕ ਵਿੱਚ ਆਉਂਣ ਨਾਲ ਫੈਲਦਾ ਹੈ। ਪ੍ਰਾਪਤ ਜਾਣਕਾਰੀਆਂ ਮੁਤਾਬਕ ਇਹ ਵਾਇਰਸ ਅਲੱਗ-ਅਲੱਗ ਚੀਜਾਂ/ਥਾਵਾਂ ਤੇ 4-100 ਘੰਟੇ ਤੱਕ ਜੀਉਂਦਾ ਰਹਿ ਸਕਦਾ ਹੈ।ਇਸ ਰੋਗ ਦਾ ਸੱਭ ਤੋਂ ਵੱਧ ਅਸਰ ਫੇਫੜਿਆਂ ਤੇ ਦਿਖਦਾ ਹੈ ਕਿਉਂਕਿ ਫੇਫੜਿਆਂ ਦੇ ਐਲਵੀਓਲਰ ਸੈਲਾਂ ਵਿੱਚ ਇੱਕ ਖਾਸ ਕਿਸਮ ਦਾ ਏਨਜ਼ਾਇਮ ਐਨਜੀਓਟੈਨਸਿਨ ਕਨਵਰਟਿੰਗ ਏਨਜ਼ਾਇਮ-2 ਸੱਭ ਤੋਂ ਵਧੇਰੇ ਮਿਲਦਾ ਹੈ ਅਤੇ ਇਹ ਵਾਇਰਸ ਆਪਣੀ ਨੁਕੀਲੀ ਬਣਤਰ ਰਾਹੀਂ ਇਸ ਏਨਜ਼ਾਇਮ ਨਾਲ ਜੁੜ ਕੇ ਐਲਵੀਓਲਰ ਸੈਲਾਂ ਵਿੱਚ ਪ੍ਰਵੇਸ਼ ਕਰ ਜਾਂਦਾ ਹੈ ਅਤੇ ਆਪਣੇ ਵਰਗੇ ਹੋਰ ਵਾਇਰਸ ਪੈਦਾ ਕਰਦਾ ਹੋਇਆ ਗਿਣਤੀ ਵਿੱਚ ਕਈ ਗੁਣਾ ਵੱਧ ਕੇ ਫੇਫੜਿਆਂ ਵਿੱਚ ਸੋਜ ਪੈਦਾ ਕਰ ਦਿੰਦਾ ਹੈ ਜਿਸ ਨਾਲ ਮਰੀਜ਼ ਨੂੰ ਸਾਹ ਲੈਣ ਵਿੱਚ ਤਕਲੀਫ਼ ਆਉਂਦੀ ਹੈ। ਅਜਿਹੇ ਮਰੀਜ਼ ਦੇ ਛਿੱਕ ਜਾਂ ਖਾਂਸੀ ਨਾਲ ਨਿਕਲਣ ਵਾਲੇ ਪਾਣੀ ਦੇ ਛਿੱਟਿਆਂ ਦੇ ਸੰਪਰਕ ਵਿੱਚ ਆਉਂਣ ਨਾਲ ਇਹ ਸੰਕ੍ਰਮਣ ਇੱਕ ਤੋਂ ਹੋਰਨਾਂ ਕਈ ਵਿਅਕਤੀਆਂ ਵਿੱਚ ਚਲਾ ਜਾਂਦਾ ਹੈ।