ਪੱਤਰ ਪੇ੍ਰਰਕ 9ਜੁਲਾਈ, ਨਿਹਾਲ ਸਿੰਘ ਵਾਲਾ: ਨਿਹਾਲ ਸਿੰਘ ਵਾਲਾ ਤੋਂ ਸਾਬਕਾ ਵਿਧਾਇਕ ਅਜੀਤ ਸਿੰਘ ਸ਼ਾਂਤ ਨੇ ਜਗਰਾਉਂ ਤੋਂ ਸਾਬਕਾ ਵਿਧਾਇਕ ਐਸ ਆਰ ਕਲੇਰ ਨੂੰ ਸਾਹਿਤਕ ਪੁਸਤਕਾਂ ਦਾ ਸੈੱਟ ਭੇਂਟ ਕੀਤਾ। ਨਿਹਾਲ ਸਿੰਘ ਵਾਲਾ ਵਿਖੇ ਇੱਕ ਮਿਲਣੀ ਦੌਰਾਨ ਸੇਵਾ ਮੁਕਤ ਏ ਡੀ ਸੀ ਐਸ ਆਰ ਕਲੇਰ ਨੂੰ ਪ੍ਰਸਿੱਧ ਵਿਦਵਾਨਾਂ, ਲੇਖਕਾਂ ਸ਼ੇਖ ਸਾਅਦੀ ਦੇ ਜੀਵਨ ਤੱਤ, ਮਿਰਜ਼ਾ ਗਾਲਿਬ ਦੀ ਸ਼ਾਇਰੀ ਅਤੇ ਹੋਰ ਸਾਹਿਤਕਾਂ ਦੀਆਂ ਪੁਸਤਕਾਂ ਭੇਂਟ ਕੀਤੀਆਂ। ਇਸ ਮੌਕੇ ਅਜੀਤ ਸਿੰਘ ਸ਼ਾਂਤ ਨੇ ਕਿਹਾ ਕਿ ਮੇਰੇ ਪਿਤਾ ਗੁਰਦੇਵ ਸਿੰਘ ਸ਼ਾਂਤ ਸਾਹਿਤ ਰਚਦੇ ਅਤੇ ਗਾਉਂਦੇ ਵੀ ਸਨ। ਉਹਨਾਂ ਕਿਹਾ ਕਿ ਮੈਂ ਅਧਿਆਪਨ ਕਾਰਜ ਵੇਲੇ ਤੋਂ ਗਜ਼ਲ, ਕਵਿਤਾਵਾਂ ਲਿਖ ਰਿਹਾ ਹਾਂ, ਵਿਧਾਇਕ ਹੁੰਦਿਆਂ ਵੀ ਮੇਰਾ ਸਾਹਿਤ ਤੋਂ ਮੋਹ ਨਹੀਂ ਘਟਿਆ। ਸਾਬਕਾ ਵਿਧਾਇਕ ਐਸ ਆਰ ਕਲੇਰ ਨੇ ਦੱਸਿਆ ਕਿ ਉਸ ਨੂੰ ਕਿਤਾਬਾਂ ਪ੍ਰਾਪਤ ਕਰਕੇ ਬਹੁਤ ਖੁਸ਼ੀ ਹੋਈ ਹੈ, ਉਹ ਸਾਹਿਤ ਦੇ ਸਜੀਦਾ ਪਾਠਕ ਹਨ। ਇਸ ਮੌਕੇ ਚੇਅਰਮੈਨ ਮਨਜੀਤ ਸਿੰਘ ਢਿੱਲੋਂ ਜਗਰਾਉਂ, ਰਾਜੂ ਸ਼ਾਂਤ, ਫਿਲਮ ਲੇਖਕ ਦੀਪਕ ਬਾਜ, ਗਾਇਕ ਬਲਬੀਰ ਬੀਰਾ, ਹਰਬੰਸ ਤੇ ਹੋਰ ਸਖਸ਼ੀਅਤਾਂ ਵੀ ਮੌਜੂਦ ਸਨ।